2025 senesiniñ arman ayına qadar Rusiye Federatsiyası tarafından apishanelerde ya da işğal etilgen topraqlarda tutulğan Qırımnıñ 98 siyasiy mabüsiniñ acele tibbiy yardımğa ihtiyacı bar. Bu aqta ZMINA insan aqları Merkeziniñ leyhalar idarescisi Viktoriya Nesterenko bildirdi.
"2024 senesiniñ boş ayında olğan malümatqa köre, Kremlniñ mabüsleriniñ sayısı 31-ge arttı: o vaqıt 67 kişi edi. Böyle bir artış, sadece mabüslerniñ tutuv şaraitleri iç bir sanitar-gigiyenik qaidelerge uymağanı ve olarğa ihtisaslı tibbiy yardım kösterilmegeninden sebep degil, aynı zamanda işğalge qarşı çıqqanlarğa qarşı basqılar devam etkeninden de ola. Şunıñ içün Qırımdan siyasiy mabüslerniñ sayısı ep arta", — dep aytıla haberde.
Sağlığı fenalaşqanlar arasında qırımtatar Amethan Abdulvapov da bar. Erkek tuvğanlarına Angarsk (Rusiye Federatsiyası) 2-nci tüzetüv cezahanesinde insultqa oğrağanını bildirdi. O, qorantasından yürek içün ilâc yollamasını rica etti, çünki cezahanede tedaviylemek içün ilâc yoq. Bundan da ğayrı, tişleri, qan basımı ve damarları ile bağlı problemleri bar.
Vladimir şeeriniñ 2-nci apishanesinde bulunğan Ansar Osmanov, tişi ağrısından şikâyet ete. Bu aqta "Qırım birdemligi"ne onıñ qadını Meryem Osmanova ikâye etti. Onıñ aytqanına köre, aqayını ayaqlarında ve bütün bedeninde çıqqan eşkenler raatsızlay. Ansar hastalıqnıñ sebebini bilmey, çünki ekim onı baqmadı.
Vadim Siruknıñ tiş problemleri bar. Keyfiyetsiz tiş qalpaqları sebebinden astında aş qala. Qorantası bir qaç kere bir ekim tutmaq ricasınen Salavat şeeriniñ 2-nci tüzetüv cezahanesiniñ memuriyetine muracaat etti, amma bir cevap almadı.
Qırımtatar Enver Halilâyevde köbek quvuldığı tapıldı. Davanıi baqılması devam etkence, quvuldıq ameliyatını yapmaqnı yasaq ettiler. Halilâyevniñ eşitüv problemleri de bar, olar baş qan damarlarınıñ bozuluvı sebebinden ola bile.
Aq qoruyıcılar qayd eteler ki, 2014 senesi yarımadada basqılar başlağanından berli Kremlniñ apishanelerinde tutulğan mabüslerniñ esas meselesi — olarğa tibbiy yardım kösterilmemesidir. Hususan, saqatlar, esli-başlılar, hronik hastalıqları olğan, ya da ağır şaraitlerden sebep ağır hastalıqlarğa oğrağan ve işkencege oğrağan insanlar içün.
