Rusiye kontrolindeki Qırım Yuqarı mahkemesi Qırımnıñ Canköy rayonında yaşağan qadınnı yarımadada Rusiye Silâlı quvetleri aqqında malümat bergeninde qabaatlap, 15 yıl cezahanede qalmasına ve 100 biñ ruble para cezasına mahküm etti. Bu aqta avgustnıñ 20-nde Rusiye mahkemesiniñ matbuat hızmeti içtimaiy ağlardaki saifelerinde haber etti.
Beyanatqa köre, 1996 senesi doğğan qızğa qarşı cinaiy davanıñ baqılması qapalı mahkeme oturışında keçti.
Mahkeme, mabüsni Rusiye Federatsiyasınıñ Ceza kodeksiniñ 275 maddesine istinaden qabaatladı — devlet hainligi, yani Rusiye Federatsiyasınıñ vatandaşı tarafından yapılğan casuslıq.
Mahküm etilgenniñ adı ve soyadı aytılmay, onıñ açıq izaatları ya da imayesi mevamı bildirilmey. Ukrayina tarafı bu ükümge daa cevap bermedi.
"KrımSOS" aq qoruyıcı teşkilâtınıñ malümatına köre, 2024 senesi eñ az 56 qırımlı Rusiye akimiyeti tarafından taqip etilgen edi. Cinaiy davalar içün sebepler olaraq Rusiye Federatsiyasında yasaq etilgen teşkilâtlarnen alâqalar, devlet hainligi, casuslıq, açıq beyanatlar, diversiya teşkil etüv ya da zorbalıq çağıruvları şeklinde qabaatlavlar qullanıldı.
