NATO baş kâtibi Mark Rutte bildirgenine köre, soñki ayları Yaponiya ve Avstraliyanen beraber 30 memleket Ukrayina içün telükesizlik kefaletleri üzerinde çalışa. Bu aqta o, Fox News telekanalınıñ yayınında ayttı.
Onıñ bildirgenine köre, teşebbüsniñ yolbaşçılığını Büyük Britaniyanıñ baş naziri Keir Starmer ve Frenkistan prezidenti Emmanuel Makron yapalar.
ABD Ukrayina içün telükesizlik kefaletleriniñ kontseptsiyasında iştirak etmege azır olğanını bildirdi, dep ayttı Rutte, yaqın künleri bu tafsilâtlıca muzakere etilecek, dep qoştı.
«Mında muzakere etkenlerimiz – NATOda azalıq degil. Mında muzakere etkenimiz – 5-inci maddege köre Ukrayina içün telükesizlik kefaletleri. Neni qavrap alacaqları daa tafsilâtlıca muzakere etilecek», – dep qoştı o.
NATO baş kâtibi qayd etkenine köre, kefaletler uzun müddetli barışıq ya da tolu barışıq añlaşmasından soñ çalışıp başlaycaq.
Rutte Washingtonda yer üstü ordularnıñ olması muzakere etilmedi dep qayd etip, Beyaz saraydaki körüşüvni muvafaqiyetli dep adlandırdı.
Ukrayina devam etken Rusiye istilâsı vaqtında NATOğa qoşulmaq istegenini ya da Washingtondan ya da Avropa «istegenler koalitsiyasından» ciddiy telükesizlik kefaletlerini almağa istegenini bildirgen edi.
Moskva ise NATOnıñ kenişlememesini – yani Ukrayinanı ittifaqqa qoşulmaq aqqında marum etilmesini talap ete.
Amerika memurları Ukrayinanıñ NATO azalığını çoqtan red ete.
