Rusiye tarafından 14 yılğa azatlıqtan marum etilgen Aqmescitli faal Akim Bekirov Çuvaşiya Cumhuriyetiniñ Tsivilsk şeerindeki №9 koloniyada sağlığı fenalaşa, dep tarif etti. Bu aqta ömür arqadaşı Sabriye Bekirova «Qırım birdemligine» haber etti.
Onıñ aytqanına köre, Bekirovnıñ tişleri baqılmalı. Onıñ boyun östeohondrozı bar ve teri yaramay.
«Bazıda [teri alı] bir qarar, amma ara-sıra teri çıqa, kiçik-kiçik eşken bar. Aqayım ekimlerge kösterdi – faydası yoq. Ağrıdan ve başqa şeylerde ilâc almağa teklif eteler», – dedi Bekirova.
Akim Bekirov – qırımtatar faali. Apiske alınmazdan evel IT telükesizliginen oğraştı, SİZOğa yollamalar yapmağa yardım ete, mahkemelerge bara edi.
2019 senesi martnıñ 27-nde Rusiye uquq qoruyıcıları Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. 20-den çoq qırımtatar faali tutulğan edi. Olarnı Rusiyede ve işğal etilgen Qırımda yasaqlanğan, amma Ukrayinada ve bir çoq memlekette milliy qanunlar seviyesinde sıñırsız areket etken «Hizb ut-Tahrir» teşkilâtında iştirak etkeninde qabaatladılar.
2023 senesi martnıñ 18-nde Rusiyeniñ Rostov-na-Donu mahkemesi «Qırım birdemliginiñ» beş faaline üküm çıqardı. Qırımtatar faalleri Akim Bekirov, Seytveli Seytabdiyev, Rustem Seythalilov 14 yılğa, Eskender Suleymanov veAsan Yanikov 15 yılğa koloniyada qalmasına üküm etildi.