Qanunsız ilhaq etilgen Qırımda üç künden berli furtuna havfı bar. Qara deñizde dalğalar dört seviyede qayd etile. Köylerni suv bastı ve biñlernen qırımlı ışıqsız qaldı. Ne ola ve yaqın vaqıtta ne beklemek mümkün, Qırım.Aqiqatnıñ maqalesinde oquñız.
Qırımda üç kün devamında furtuna bar. Yarımadada boranlı yağmur ve küçlü yel qayd etile. Yerli sinoptikler böyle tabiatnı Qara deñizdeki şarqiy suvlarda tsiklonnen bağlay.
Qırımda bunı, bir taraftan, yaz sıcağından soñ qolaylaşuv ve suv qıtlığı vaziyetinde tabiat çoqraqlarınıñ suvnen toluv fırsatı olaraq köre. Diger taraftan, furtuna Qırımnıñ şimali, merkezi ve cenübi sakinlerine problemler ketirdi. Yaqın künlerde regiondaki ava kene sürprizlernen kele bile, dep tahmin ete sinoptikler.
Deñiz qurbanları
Furtuna Qırımnıñ Cenübiy yalısına da tesir etti. Aluşta civarındaki Degirmenköy (Zaprudnoye) köyü civarında sel oldı. «Krımavtodor» hadimleri tehnika yardımınen Puşkino – Zaprudnoye – Krasnokamenka yolunda keçişni temizledi.
«Krımavtodor» hadimleri 2025 senesi sentâbr ayında furtuna neticesinde Aluşta civarında yolda olğan sel aqibetlerini yoq ete, 2025 senesi sentâbrniñ 10-u
Qırımnıñ kurort regionlarında «qadife mevsimi» vaqtında deñizge kirmege yasaqlap, yalıda raatlanmağa ve telükesizlik qaidelerine köre suvğa kirmege izin bergenler.
2025 senesi sentâbr ayında furtuna vaqtında Yalta yalısı
Furtuna vaqtında Qırımda suvda bir qaç ölüm qayd etildi.
«Üç künde suvda üç qaza qayd etildi: ne yazıq ki, beş kişi can berdi, üç kişige yardım kösterildi ve bir insan qurtarıldı. Yıl başından 35 qaza oldı, ne yazıq ki, 25 insan can berdi», – dep bildirdi Qırımnıñ Rusiye Fevqulâde vaziyetler nazirliginiñ idaresi.
Suvda insanlarnıñ ölüm sebebi furtunalı deñizde yaldamaları oldı, dep qayd etti müessise.
Suvda ve ışıqsız
Ava Qırımnıñ şimaliy ve merkeziy regionlarına büyük felâket ketirdi. Furtuna tahminen 15 biñ insannı ışıqsız qaldırdı, 145 transformator alt stantsiyasını elektriksiz qaldırdı, dep bildirdi Qırımnıñ Rusiye ükümetiniñ Energetika nazirligi.
Müessise malümatına köre, eñ çoq Lenino, İslâm Terek ve Qarasuvbazar rayonları ve Yalta zarar kördi.
Işıq söndürilüviniñ sebepleri – küçlü sağanaq ve sentâbrniñ 10-nda saniyede 22 metrge yetken yel sebebinden qazalar.
Çarşenbe künü, sentâbrniñ 10-nda, küçlü yağmur Canköy rayonında yağdı. Anda tahminen otuz topraq damartısını suv bastı. Aqsürü Qoñrat (Kondratyevo) köyünde eki soqaq (22 azbar) suv altında qaldı, As Caraqçı (Rısakovo) köyünde ise bir soqaq (dört azbar). Aqibetleri müendis tehnikası ve motopompalar yardımınen çezildi.
Rusiye Fevqulâde vaziyetler nazirliginiñ hadimleri 2025 senesi sentâbr ayında Canköy rayonında furtuna aqibetlerini yoq ete
Aqibetlerni yeñüv esnasını Qırımnıñ Rusiye prokuraturası kontrol ete.
«Yaldap yetiştiralmağanlar – Qarasuvbazarğa hoş kelsin»
Qarasuvbazar rayonında sağanaq yol ve maşinalarnı bastı.
«Yazda yaldap yetiştiralmağanlar olsa, yağmur basqan Qarasuvbazarğa hoş kelsin. Yedek qıyafet almağa unutmañız. Amma o da sılanacaqtır», – dep haber ete «Mash na volne» Rusiye Telegram kanalı.
Levhalarda yolda maşinalar yarısına qadar suvda tura.
Qarasuvbazarda soqaq ve mustaqil evlerniñ azbarlarını da suv bastı.
«Suv tizlerge qadar kele», – dep haber ete «ÇP-Krım» Telegram kanalı.
Saifeler Qarasuvbazar çarşısını da suv bastı, dep haber ete. Hadimleri suv alıp ketecek mallarnı qurtarmağa mecbur oldı. Bazar müdirligi ne mal, ne de insanlar zarar körmedi, dep bildirdi.
Regionnıñ Rusiye akimiyeti bu aqta açıq-açıq bildirmey.
Qırım qurtarıcıları yaqın künleri avanen bağlı qazalarğa azırlana.
Qırımnıñ Fevqulâde vaziyetler nazirliginiñ idare malümatına köre, sentâbrniñ 11-nden 14-ne qadar Qırım yarımadasınıñ ğarbiy ve merkeziy rayonlarında yüksek yanğın telükesinen furtuna havfı tenbisi devam etecek.