Rusiye tarafdarı olğan qırımlı bloger Aleksandr Talipov öz telegram kanalında "Flamingo" ukrayin raketasınıñ parçalarınıñ fotoresimini derc etti. Resimde raketalarnı azırlağan Ukrayinadaki şirketniñ adı ve adresi yazılğan.
"Flamingo" ukrayin raketasınıñ parçaları tapılğan işhaneniñ soñu yaqınlaşmaqta", — dep yazdı Talipov içtimaiy ağda.
Talipovnıñ derc etken fotoresimleri ve aytqanlarınıñ kerçekligini, cenk şaraitlerinde teşkermek imkânsızdır. Ukrayina tarafı bu haberni şimdilik izaatlamadı.
Bundan evel The Economist neşri, Ukrayina Rusiye territoriyasına ücüm etmek içün öz "Flamingo" raketalarını qullanmağa başladı, dep bildirgen edi. Neşirniñ malümatına köre, şimdiki vaqıtta künde 2-3 raketa yapıla, orta küz ayınıñ soñuna qadar ise er kün 7 raketa işlep çıqarılması planlaştırıla.
Bundan ğayrı, bu aynıñ başında prezident Zelenskıy, Ukrayina Rusiyege qarşı ücümler içün tek uçucısız uçaqlarnı degil de, öz başına yapılğan silânı qullana, dep bildirgen edi.