Rusiye akimiyeti qırımtatarlarnı "Noman Çelebicihan batalyonı"nıñ davaları boyunca taqip ete, dep bildirdi Qırımtatar Resurs Merkeziniñ idare yolbaşçısı Eskender Bariyev.
"Eger siz Noman Çelibicihan davasında işğalciler yalıñız erkeklerni taqip ete, dep tüşünseñiz, pek yañlışasıñız. Yaqında, Geniçesk rayonından eki qadın — qırımtatar Amina Kadır ve Elmira Umerova şartlı apis cezasını alğanları aqqında belli oldı", — dep yazdı o, Facebook saifesinde.
Bariyevniñ qayd etkenine köre, Rusiye akimiyeti içün bir insan Qırımnıñ ticaret qamaçavında iştirak etkeni ya da çetten keçkeni, "tesadüfen baqqan ya da aynı avadan nefes alğanı" müim degil, onı tutıp, "Noman Çelebicihan batalyonınıñ davası"nda apiske almaq içün yeterli.
2014 senesinden başlap Qırımtatar Resurs Merkezi "Noman Çelebicihan batalyonı"nda iştirak etüvde qabaatlanıp eñ az 66 insan yaqalandı dep qayd ete.