Rusiye Odesa vilâyetinde gaz üleştirüv stantsiyasına darbe endirdi, dep bildirdi Ukrayina prezidenti Volodımır Zelenskıy. Bu aqta o, arman ayınıñ 20-nde Ukrayinağa yapılğan Rusiye ücümlerini añıp, telegramda yazdı.
"Bu gece Ohtırkağa dron ücümi neticesinde 14 insan yaralandı. 5 aylıq, 4 yaşında, 6 yaşında balaları yaralanğan aile yardım içün muracaat etti. Donetsk vilâyetiniñ Kostântınınka şeerine KAB ücümi neticesinde beş çoq qatlı ev zarar kördi, eñ azından üç insan alâ daa viraneler altında buluna. Qurtaruv ameliyatı devam ete. Bundan ğayrı, Odesa vilâyetinde gaz üleştirüv stantsiyasına da ücüm etildi. Çerniğiv, Harkiv, Poltava vilâyetleri de ateşke tutuldı. Umumen 60-tan ziyade dron ve ballistik raketa qullanıldı", — dep yazdı Zelenskıy.
Prezidentniñ aytqanına köre, bu "kösterici darbeler", ve olar diplomatiya tolusınen çalışıp başlamağanına qadar Moskvağa basqı yapmaq ve yañı sanktsiyalar ve alımlar tayin etmek kerekligini tasdıqlay.
Bugün Ukrayina Fevqulâde vaziyetler devlet hızmetinde bildirdiler ki, Odesa vilâyetinde yaqıt-energetika infrastrukturasınıñ obyektinde Rusiye ücüminden soñ büyük yanğın çıqtı, ilk malümatqa köre, bir insan yaralandı.
Rusiye arbiyleri çeşit silâlardan Ukrayina regionlarına muntazam sürette ücüm ete.
Rusiye yolbaşçılığı, Rusiye ordusınıñ, büyük cenk vaqtında, Ukrayina şeerleri ve köyleriniñ grajdan infrastrukturasına maqsatlı darbeler endirgenini, vatandaş ealisini öldürgenini ve hastahaneler, mektepler, bala bağçaları, energetika ve suv teminlevi obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıy ve olarnıñ maqsatlı olğanını qayd ete.