İşğal etilgen Qırımda Rusiye prokuraturası ve polisi ilk küz ayından qırımtatarlarnıñ toplu yaşağan yerlerine diqqatını arttırmaqta. Bu aqta Qırım.Aqiqatqa Qarasuvbazarda qırımtatarlar yaşağan Sarısu mikrorayonında yaşağan faal bildirdi.
"Malümat stendlerinde er türlü patlayıcı maddelerni teslim etmek kerekligi aqqında ilânlar peyda olmağa başladı. Vesiqa hadimleri evlerni muntazam sürette ziyaret etip, sualler bereler, laf etkenlerni qıdıralar, olarnı işke alalar. Ekinci kere yanıma kelgen bölük hadiminden, bu qadar faallik ne içün olğanını soradım, o, "büyük qardaşlardan" kelgen malümatqa köre, qışqa yaqın Qırımda ukrayin mahsus hızmetleri kritik infrastruktura obyektlerini bozuv ameliyarını keçirmege planlaştırğanlarını ayttı. Qırımtatarlarnıñ buña ne alâqası bar, dep sorasam, o, iç bir şey añlatmadı ve qırımtatar halqınıñ çoqusınıñ siyasiy baqışını er kes bilgenini añlatmaqnen sıñırlandı", — dep tarif etti Qırım.Aqiqatqa faal.
Onıñ aytqanına köre, bu kibi vaziyet tek Sarısuda degil de, Qırımda qırımtatarlar toplu yaşağan diger yerlerde de qayd etile.