Qırım saifeleri aqşam ve gece uçucısızlarnıñ Qırım yarımadasındaki obyektlerge ücüm etkenini bildire.
Qırım.Aqiqat menbası Kezlev, Saq, Aqyar, Canköy, Aqmescit ve Kefede atış ve patlavlar aqqında bildirdi.
«Krımskiy veter» Telegram kanalı Kefe cermay terminalına darbe aqqında bildirdi, anda yanğın çıqqan. Kefedeki patlav ve yanğınlarnı yerli saifeler tasdıqlap, fotoresim ve videolarını derc ete.
Kefe cermay terminalında eki büyük yanğın yeri qayd etile, dep haber ete «Krımskiy veter» monitoring gruppası uydu çekimlerine esaslanıp.
«ÇP-Krım» Telegram kanalı Kefede Keriç köpründe areket qapatılğanını yaza. Fedko soqağında da naqliyat ve yaya areketi qapatıldı, dep bildirdi şeerniñ Rusiye memuriyeti. Keriç şossesi ve Fedko soqağı cermay bazasına yaqınlar.
Rusiye Mudafaa nazirligi Ukrayina ava dronlarınıñ darbesini tasdıqladı, amma Rusiye Ava mudafaasınıñ quvetleri Qırımda 40, Qara deñizde 62 ve Azaq deñizinde 5 uçucısıznı urıp tüşürdi, dep bildirdi.
Ukrayina tarafı Qırım ücümini şimdilik izaatlamadı.
Rusiyeniñ Ukrayinağa qarşı büyük istilâsı başlağan soñ Kefe cermay bazası ava ücümleriniñ nişanı çoq oldı.
2022 senesinden başlap yarımadağa er kün ücüm ete, çoqusı allarda Rusiye Mudafaa nazirligi ya da Rusiye akimiyeti arbiy obyektlerge ücüm etilgenini tasdıqlamay.
