Rusiye Federatsiyası ve ABD muzakereleriniñ esas meselelerde üçünci raundı küzniñ soñuna qadar ötkerilecek, dep bildirdi Rusiye Tış işler naziriniñ muavini Sergey Râbkov TASS Rusiye agentligine.
"Küzniñ soñunaca kesen-kes olacaq. Künleri şimdilik yoq, er şey muzakere etile", – dep ayttı Rusiye diplomatı.
Amerika tarafı bunı şimdilik haber etmedi.
Fevralniñ 27-nde ve aprelniñ 10-nda İstanbulda hususan Rusiye ve ABD elçihaneleriniñ işine bağışlanğan muzakereler keçirilgen edi. İyün ayında muzakerelerniñ nevbetteki basamağı olacaq edi, amma lâğu etildi.
Memleketler arasında bağlar Amerika memuriyeti deñişken soñ ve cumhuriyetçi prezident Donald Trump Beyaz sarayğa qaytqan soñ normalleşti.
