Rusiye ordusı gece Ukrayinağa 49 Shahed darbe uçucısızı, «Gerber» ve Millerovo, Brânsk ve işğal etilgen Qırımdaki Çavda burnundan diger uçucısızlarnen ücüm etti, dep haber ete Ukrayina Silâlı quvetleriniñ Ava küçleriniñ komandanlığı oktâbrniñ 1-nde.
Bundan ğayrı, Rusiye arbiyleri Qırımdan «Oniks» gemilerge qarşı raketasını ve Rusiyeniñ Örel vilâyetinden dört «İskander»-M/KN-23 ballistik raketasını uçurdı.
Ava ücümini aviatsiya, radioelektron küreş ve mobil ateş gruppalarınıñ bölükleri keri qaytardı.
«İlk malümatqa köre, saat 09.30-ğa qadar ava mudafaası memleketniñ şimali, şarqı ve merkezinde 44 Shahed, «Gerber» ve çeşit dronlarnı urdı/bastırdı», – dep aytıla haberde.
Ukrayina arbiyleri beş raketa ve uçucısıznıñ altı yerde tüşkenini qayd etti.
Rusiye arbiyleri Ukrayina regionlarına çeşit silâlardan muntazam sürette ücüm ete.
Rusiye yolbaşçılığı, Rusiye ordusınıñ büyük cenk vaqtında Ukrayina şeerleri ve köyleriniñ grajdan infraterkibine maqsatlı darbeler endirgenini, vatandaş ealisini öldürgenini ve hastahaneler, mektepler, bala bağçaları, energetika ve suv teminatı obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıy ve olarnıñ maqsatlı olğanını qayd ete.
