Rusiye kontrolindeki Qırım Yuqarı mahkemesi Yalta sakinini Ukrayina telükesizlik hızmetinen işbirligi içün «devlet hainliginde» qabaatlap, 14 yılğa üküm etti. Bu aqta Qırımnıñ Rusiye prokuraturasınıñ matbuat hızmeti haber ete.
Erkek 2022 senesi fevral ayından iyul ayına qadar Qırımda uquq qoruyıcı organlarınıñ sabıq hadiminen bağlanıp, işbirligine celp etmege rica etken Ukrayina mahsus hızmetiniñ vekilinen bağda olğan eken. Erkek Rusiye Federatsiyasınıñ FSBsi tarafından tutuldı. Cenk vaziyetinde Rusiye uquq qoruyıcılarınıñ malümatını teşkermek imkânsız ola.
Dava mabüsiniñ adı ve soyadı aytılmay, onıñ bu ükümnen bağlı fikirleri yoq. Ukrayina telükesizlik hızmeti bu haberni izaatlamadı.
«KrımSOS» aq qorçalayıcı teşkilâtınıñ malümatına köre, 2024 senesi eñ az 56 qırımlı Rusiye akimiyeti tarafından taqip etildi. Cinaiy davalarnıñ sebebi Rusiyede yasaqlanğan teşkilâtlarnen bağlar, devlet hainligi, casuslıq, açıq fikir bildirüvleri, diversiyalar ya da zorbalıq çağıruvlarında qabaatlavlar olğan.
Aq qorçalayıcılar Rusiye uquq qoruyıcıları açqan devlet hainligi, işbirligi ve casuslıq davaları bir qaç qat artacaqtır, dep tahmin ete. Şimdi FSB aman-aman er kün böyle davalar aça, 2014 senesine qadar olarnıñ sayısı yılda eñ çoq 10 edi. Ukrayinağa qarşı büyük istilâdan soñ devlet hainligi maddesi Rusiyede cenkke qarşı çıqqanlarğa qarşı qullanılğan maddelerden eñ populârı oldı.
