Ukrayina prezidenti Volodımır Zelenskıy elâk olğan qırımlı, vatandaş faali, arbiy ve Kremlniñ eski mabüsi Gennadiy Afanasyevge Ukrayina Qaramanı unvanını berdi.
Böyle bir ferman Ukrayina prezidentiniñ ofis saytında derc etildi.
Diger buyruqlarnen Ukrayina Qaramanı unvanı yazıcı, terciman, cemaat erbabı Volodımır Vakulenko, cemaat faali Stepan Çubenko ve Ukrayina siyasetçisi, cemaat erbabı Andriy Parubiyge berildi.
Aqmescitli fotoqraf ve uquqçı Ğenadiy Afanasyevniñ adı «Qırım terroristleri» davasınıñ mabüsi olğanından soñ belli oldı. 2014 senesi o, Rusiyeniñ Qırım ilhaqına qarşı çıqqan edi, bundan soñ onı Aqmescitte FSB hadimleri terror ücümlerini azırlağanında qabaatlap yaqaladılar. O vaqıt onıñnen beraber bu davanıñ diger mabüsleri de tutuldı. Halqara aq qorçalayıcı teşkilâtlar bu davanı siyasiy dep adlandırdı. O, 767 kün apiste yatqan edi.
2016-2018 seneleri Ğenadiy Afanasyev Rusiye apishanesinden azat etilgen soñ Qırım.Aqiqat müellifi edi.
2022 senesi dekabrniñ soñunda Afanasyev Luğansk vilâyetinde elâk olğanı belli oldı. O, 241 brigadasınıñ 130 batalyonında cenkleşti. Afanasyev, Rusiyeniñ Ukrayinağa arbiy istilâsınıñ birinci künü arbiy komissarlıqqa ketti. Bu yıl mayıs ayında halq deputatları oña Ukrayina Qaramanı unvanını bermege çağırdı.
