Kyivde oktâbrniñ 15-nde «Qırımnıñ tamırları» adlı eki aftalıq sergi açıla. Oktâbrniñ 29-na qadar devam etecek sergi ukrayinlerni yarımadanıñ tamır halqları qırımtatarlar, qaray ve qırımçaqlarnıñ medeniyeti ve tarihınen tanıştıracaq.
Sergi bir qaç animatsion filmi de olğan «Kitap-seyaat. Qırımnıñ tamırları» yañı tasil-medeniyet leyhasınıñ bir qısmı ola.
Sergide taqdim etilecekler:
- Tamır halqlarnıñ medeniyetinen bağlı sözlerniñ elifbesi;
- Qırımtatar ressamı Rustem Skibinniñ resimleri;
- Qaraylarnıñ milliy urbası;
- Qırımtatar milliy urbasından ilhamlanıp tikilgen Gaptulvalnya anteri.
- Sergi Ukrayinanıñ tamır halqlarını saqlap qaluv munaqaşasınen beraber açılacaq.
«Biz Ukrayinanıñ tarihı onıñ bütün halqlarınıñ tarihı olğanını köstermege tırışamız. Qırımtatarlar, qaray ve qırımçaqlar – az sayılı, amma Ukrayinanıñ medeniyetine tesirlerine köre büyük halqlar. Maqsadımız – seslerini eşittirmek», – dep ayttı «Kitap-seyaatnıñ» teşkilâtçılarından biri İrina Taranenko.
Leyha ukrayin yıldızları tarafından seslendirilgen üç qısqa multfilmden ibaret. Bu filmler eglence vastasınen Qırım halqlarınıñ ananeleri ve turmuşınen tanıştıra: qaray kenasları ve qırımçaq Tevratından qırımtatar qavesine qadar. Azırlıqlarını «Kerçek tarih» müellifi, jurnalist Akim Galimov yaptı.
Leyha müellifleri qayd etkenine köre, «Kitap-seyaatnıñ» maqsadı – Qırım Ukrayina olğanını kösterip, Qırımnı añlatmaq, tamır halqlarnıñ medeniyetini canlandırmaq ve sovetlerniñ yañlış malümatını yoq etmek.
2001 senesiniñ ealini cedvelge aluv neticelerine kre, Ukrayinada tahminen 250 biñ qırımtatarı yaşay edi, tahminen 400 qırımçaq bar edi. Olarnıñ sayısı dünyada eñ az sayıla, tilleri ve medeniy mirasları ğayıp oluv telükesi altında buluna.
«Tamır halqlarnıñ elifbesi» sergisi oktâbrniñ 15-nden 29-na qadar Gulliver alış-veriş merkezinde çalışacaq. Kiriş serbesttir.
«Kitap-seyaat. Ukrayina» – resimli kitap, animatsion film ve eglence vastasınen ögretüv formatında interaktiv sergilerni teşkil etken tasil-medeniyet leyhasıdır.
«Kitap-seyaat. Qırımnıñ tamırları» leyhası Ukrayina medeniyet fondunıñ yardımınen Green Penguin Media kreativ agentligi tarafından ömürge keçirile ve 2018 senesinden berli YouTubede olğan ve çoq seyir etilgen «Kitap-seyaat. Ukrayina» multserialınıñ devamı ola.
