Rusiyeniñ Ukrayinağa qarşı keñ kölemli basuvına qarşılıq bildirgen soñ Rusiye Federatsiyasında 15 yıl apis cezasına mahküm etilgen qırımlı Bogdan Ziza Rusiye vatandaşlığından çıqıp oldı. O, "Rusiye ordusına para bermemek içün" apishanede çalışmaqnı da red ete, dep bildire qorantası. Bogdan Ziza 2022 senesi quralaydan berli apiste buluna.
Kezlevli ressam Ziza Rusiyeniñ Ukrayinağa basuvına razı olmağan bir çoq qırımlılardan biridir. 2022 senesi quralayda o, Kezlevdeki Rusiye memuriyetiniñ binasına sarı ve mavı boya tökti, yaqıcı qarışmanen şişeni atıp, öz narazılığını bildirdi.
O vaqıt kimse zarar körmedi. Amma bu cenkke qarşı aktsiyanı Rusiye akimiyeti "terakt" olaraq tanıdı. Qırımlı "terrorist" olaraq mahküm etildi. Ukrayina aq qorçalayıcıları bu davanı siyasiy sebeplerden yapılğan dep adlandıra.
Ukrayina prezidentiniñ Qırım Muhtar Cumhuriyetindeki Temsilciligi bundan evel "Bogdan Zizanıñ qanunsız apis etilmesini" takbih etti ve Rusiyeden onıñ azat etilmesini talap etti.
"Öldürüv içün azca ceza berile"
Aqmescit SİZO-sında bulunğan Bogdan Ziza Qırım.Aqiqatqa bergen intervyüsında, onıñ aktsiyası "cenkke qarşılığınen bağlı içindeki ağrısını az olsa da qandırmaq" edi, dep añlattı.
Bogdan Ziza Rusiye mahkemesi tarafından RF Ceza kodeksiniñ dört maddesine istinaden mahküm etildi: 205 maddeniñ 1-inci qısmı (terakt yapuv), 205 maddeniñ 2-nci qısmı (terakt yapuv telükesi), 205.2 maddeniñ 2-nci qısmı (terrorizmge çağıruv), 214 maddeniñ 2-nci qısmı (siyasiy sebeplerden vandalizm). O, qabaatını tanımay ve onıñ davasınen başqa fikirde olğanlarnı qorquzmağa tırışalar, dep tüşüne.
"Biz epimiz añlaymız ki, bu mahkeme adiy bir adisedir. Üküm adaletli degil, sistemağa köre çıqarılacaq. Rusiye qanunlarına köre öldürüv içün bile azca müddet berile, men ise öldürüvlerge qarşı edim", — dep bildirdi apishaneden Bogdan Ziza.
Крымчанин отбыл менее четырех лет заключения из 15-ти, предусмотренных российским приговором. Он находится в тюрьме «Владимирский централ» во Владимире и вопреки всему, не изменил своей позиции.
Qırımlı oña tayınlengen 15 yıllıq apis cezasınıñ dört yıldan azını artıq çekti. O, Vladimirniñ Vladimir merkeziy apishanesinde buluna ve er şeyge baqmadan, öz mevamını deñiştirmedi.
"Yel, dımlılıq ve pek siyrek kezintiler"
Ukrayinanıñ qıtaiy qısmında yaşağan Bogdan Zizanıñ qorantası yazışuvlar vastasınen onıñnen bağ tutmağa tırışa. Tuvğanları "Vladimir merkezi"nde qırımlınıñ "şaraitleri az-çoq normal" olğanını ögrenip olğan, amma sağlığı fenalaşa eken.
"Bogdannı eki kişilik kamerağa avuştırdılar. Bu evelkisinden yahşıca, çünki evel o, bir çoq mabüsnen bir kamerada otura edi, ve bu qolay degil edi. Onıñ bazı sağlıq problemleri bar, olarnı çezmege tırışamız. Anda yel, dımlılıq ve küneş yoq. Bu apishanede mabüslerni siyrek kezmege çıqaralar. Bu işkence usullarından biridir. Şunıñ içün böyle şaraitlerde sağlığınıñ fenalaşması vaqıt meselesi. Bogdan ise endi dört yıldan berli apiste buluna. Sağlıq probleri artıq peyda ola bile", — dep tarif etti Qırım.Aqiqatqa eki doğmuş qardaşı Aleksandra Barkova.
Bogdan Zizanıñ alı ve apis müddeti aqqında resmiy malümat yoq. Daa evel o, Qırımda yaqalanğan soñ, FSB tarafından akimiyetke kerekli şekilde itiraf almaq içün köteklengenini bildirgen edi.
2023 senesi Bogdan Ziza, Rusiye apishanelerinde ve SİZO-larında tutulğan ukrayinalı siyasiy mabüslerniñ taqdirine diqqat celp etmek içün açlıq ilân ve Rusiye vatandaşlığından marum etilmesini talap etken edi O, 17 kün devamında 10 kilogramm azğan edi. Bundan soñ qırımlı sağlıq vaziyeti sebebinden aktsiyasını toqtatmağa mecbur oldı.
"Ciddiy aqibetler ola bile"
Apiske alınğan Bogdan Ziza vatandaşlıq mevamını bildirmege devam ete. Aleksandra Barkovanıñ aytqanına köre, o, "Rusiye ordusına para bermemek içün" apishanede çalışmağa razı olmadı.
Bogdan apishanede bulunıp, sistemağa qarşı areket etkenini körmek pek qorqunçlıAleksandra Barkova
"Bogdannıñ serbest laf etip olması printsipial mesele olğanını bilem. Elbette, men buña qol tutamam, çünki bunıñ ciddiy aqibetleri ola bilecegini bilem. Bunı o yerlerden qaytqan siyasiy mabüsler ayta. Men Vladislav Yesipenko ile körüşüvge bardım. O, em işkence, em de maneviy zorbalıq aqqında tarif ete. Bogdan apishanede bulunıp, sistemağa qarşı areket etkenini körmek pek qorqunçlı", — dep ayta Bogdannıñ tatası Ziza.
Rusiye apishanesinde Bogdan Ziza, Rusiye 2014 senesi Qırımnı işğal etken soñ alğan Rusiye vatandaşlığından marum etilmesini talap etti.
"Bogdan, Rostovdaki soñki mahkeme vaqtında, oña 2014 senesi zornen berilgen Rusiye vatandaşlığından marum qalmaq istegenini bildirdi. Bundan da ğayrı, o, Rusiye Federatsiyasınıñ vekâletli organlarına vatandaşlığından marum etilmesi aqqında bir qaç kere yazdı. Men bunı Bogdannıñ şahsiy iradesiniñ ifadesi olaraq körem, o, Rusiye ve onıñ milletinen iç bir alâqası olmağanını istey", — dep tarif etti Aleksandra Barkova.
Bogdan Ziza 2023 senesi Rostov-na-Donu mahkemesinde ükümden evel soñki sözünde Rusiye vatandaşlığından marum etilmesini talap etkenini bildirdi.
"Rusiye Federatsiyasınıñ vatandaşlığından marum etilmemni ve bütün ukrayinalı siyasiy mabüslerniñ azat etilmesini talap etip, açlıqnı ilân etem. Apishanede maña bir şey olsa, cemiyetniñ bu men memleketinde cenkke qarşı çıqqan ukrayinalı olğanımdan sebep olğanını bilmesini isteyim", — dep bildirgen edi o.
Onıñ qorantası, Bogdan Ziza "Rusiye vatandaşı olaraq tanılmasa", onıñ azat etilmesine yardım eter, dep ümüt ete.
