Rusiye Federatsiyasınıñ mahkemesi tarafından 13 yılğa üküm etilgen qırımlı faal Oleg Fedorov sekiz ay devamında Rusiyeniñ Udmurtiya şeerindeki koloniyanıñ ceza izolâtorında (ŞİZO) tutuldı. Bu aqta apayı İrina Fedorova «Qırım birdemligi» cemaat birleşmesine haber etti.
Berilgen malümatqa köre, yaqınlarda Oleg Fedorov Hohrâki köyündeki İK-8 ceza izolâtorından çıqarıldı. Sarapulnıñ İK-5 ceza izolâtorında da qaldı. Fedorovnıñ Sarapul koloniyasınıñ izolâtorına qapatılğanı bu yılnıñ başında belli oldı.
İrina Fedorova tarif etkenine köre, ŞİZOda qalğan vaqtında aqayınıñ sağlıq vaziyeti «fenalaştı» – hronik hastalıqları özüni belli etti. Faal yazğan mektüplerinde ilâclar kerek, dep haber etti – qorantası yollay edi.
«Pek azdı, çünki berilgen aşlarnı aşay edi, anda ise et qoşula, anda da domuz eti ola. Şunıñ içün esasen qavaltı ve aqşam yemekleri oldı», – dep qayd etti İrina Fedorova.
Onıñ aytqanına köre, ömür arqadaşını evine yaqın koloniyağa avuştırmaları içün ariza bergen edi, amma «bir yıldan berli red cevaplar kele».
Oleg Fedorov – Bağçasaraylı iş adamı. Apiske alınmazdan evel Qırımda siyasiy sebepli davalarğa bara, qırımtatar siyasiy mabüslerge qoltutuv haber kampaniyalarında ve fleşmoblarda iştirak ete, Qırımlı reinelerniñ qorantalarına maddiy yardım köstere edi.
2021 senesi fevralniñ 17-nde Qırımda Qarasuvbazar, Bağçasaray, Aqmescit, Aqyar ve İçki rayonında kütleviy tintüvler keçirildi. Lenur Seydametov, Timur Yalkabov, Azamat Eyupov, Yaşar Şihametov, Ernest İbragimov ve Oleg Fedorov evlerinde keçirilgen tahqiqat tedbirlerinden soñ Qırımdaki FSB idaresine ketirildi. Soy-soplarına FSB tahqiqatçıları tutulğanlar Rusiye Ceza kodeksiniñ 205.5 maddesine istinaden qabaatlana. Qırımtatarlar Rusiyede yasaqlanğan, amma Ukrayınada ve bir çoq memlekette milliy qanunlar seviyesinde sıñırsız çalışqan «Hizb ut-Tahrir» teşkilâtı ile alâqaları bar olğanında qabaatlandı.
2022 senesi sentâbrniñ 9-nda Rostov-na-Donu Cenübiy okrugınıñ arbiy mahkemesi Yaşar Şihametovnı terrorizmde qabaatlap, 11 yılğa azatlıqtan marum etti.
Aq qorçalayıcılarnıñ fikirince, teşkilât azalarını ükümet devrimini azırlav ve terrorizm içün degil, firqa tarafdarlarınıñ Qırımda siyasiy repressiyalarğa qarşı cemaat aktsiyaları, Rusiye akimiyetini tenqit etkenleri ve qırımtatarlar 2014 senesi işğalge qarşı çıqqanları içün taqip eteler.
