Qırımda Rusiye quvetçileri Ukrayina Mudafaa nazirliginiñ Baş istihbarat idaresinen işbirlikte bulunğanından şübheli sayılğan bir erkekni tuttı. Bu aqta Rusiye kütleviy haber vastaları Rusiye FSB-sınıñ Qırım ve Aqyar idaresiniñ matbuat hızmetine atıf etip yaza.
1972 senesi doğğan erkek, GUR temsilcisi ile bağlanıp, fotoresim, video, Qırımdaki eki S-300 ZRK-nıñ koordinatlarını yollağanı iddia etile. Bundan ğayrı, Rusiye quvetçileri, yaqalanğan şahıs saqlama yerinden patlayıcı maddelerni alğanını bildirdi. Cenk şaraitlerinde bu iddialarnıñ kerçekligini teşkermek şimdilik imkânsız.
Tutulğan kişiniñ adı ve soyadı bildirilmey. Rusiye kütleviy haber vastaları tarafından derc etilgen Rusiye FSB-sınıñ videosında, tutulğan kişi olaraq kösterilgen bir erkek, Qırım işğaline qarşı çıqqanını ve GUR ile göñülli olaraq bağlanğanını bildire, bundan ğayrı, Rusiye quvetçileriniñ versiyasını tekrarlay. Bu ifadeler RF FSB-sınıñ basqısı altında yazılğan ola bile. Ukrayina Mudafaa nazirligi bu haberlerni izaatlamay.
"KrımSOS" aq qoruyıcı teşkilâtınıñ malümatına köre, 2024 senesi eñ az 56 qırımlı Rusiye akimiyeti tarafından taqip etilgen edi. Cinaiy davalar içün sebepler olaraq Rusiye Federatsiyasında yasaq etilgen teşkilâtlarnen alâqalar, devlet hainligi, casuslıq, açıq beyanatlar, diversiya teşkil etüv ya da zorbalıqqa çağıruvlar şeklinde qabaatlavlar qullanıldı.
