Rusiye mahkemesi 51 yaşındaki Aqyar sakinini SBU ile işbirlik yapqanı içün 15 yılğa üküm etti. Bu aqta Rusiye kütleviy haber vastaları Rusiye FSB-sınıñ Qırım ve Aqyar idaresine atıf etip bildire.
Qayd etilgenine köre, erkek SBU hadiminen messencer vastasınen bağlanıp, Rusiye ordusı aqqında istihbarat malümatını, em de naqliyat infrastruktura obyektleri aqqında malümat toplamaq kerek edi. Aynı zamanda FSB, Aqyar sakininiñ evinde, demiryol köpürlerinden birini patlatmaq içün yapılğan patlayıcı madde tapılğanını bildire. Bundan ğayrı, oña regionda Rusiye ava mudafaası aqqında malümat toplamaq içün tanışını "çıqarmağa" zorladılar.
Cenk şaraitlerinde Rusiye quvetçileri tarafından bildirilgen malümatnıñ doğrulığını tasdıqlamaq mümkün degil. "Devlet hainligi" maddesine istinaden (RF Ceza kodeksiniñ 275-inci maddesi) 15 yıl apis cezasından ğayrı, oña 50 biñ ruble para cezası da berildi.
Adamnıñ adı ve soyadı aytılmay, onıñ açıq noqta-i nazarı da belli degil. SBU bu haberlerni şimdilik izaatlamadı
"KrımSOS" aq qoruyıcı teşkilâtınıñ malümatına köre, 2024 senesi eñ az 56 qırımlı Rusiye akimiyeti tarafından taqip etilgen edi. Cinaiy davalar içün sebepler olaraq Rusiye Federatsiyasında yasaq etilgen teşkilâtlarnen alâqalar, devlet hainligi, casuslıq, açıq beyanatlar, diversiya teşkil etüv ya da zorbalıqqa çağıruvlar şeklinde qabaatlavlar qullanıldı.
