Qırımnıñ Rusiye nezareti altında olğan kurort ve turizm nazirini öldürmege areket etüvde qabaatlanğan ve Rusiye mahkemesi tarafından 12 yılğa apske mahküm etilgen qırımlı Mamut Belâlov Aqmescit şeerindeki 2-nci sanlı SİZO-da Rusiye havfsızlıq küçleri tarafından köteklendi. Bu aqta Facebook saifesinde Qırımtatar resurs merkeziniñ başı Eskender Bariyev bildirdi.
"Üküm çıqarılğan soñ yigit Qırımdan Volgogradğa 19-ncı ceza koloniyasına avuştırıldı, lâkin yaqında onıñ soy-sopları onı kene Qırımğa, bir añlatmasız qaytarğanlarını bildiler ve Aqmescit şeerindeki 2-nci sanlı SİZO-ğa yerleştirdiler", — dep yaza Bariyev.
Onıñ aytqanına köre, Belâlovnı yaqında FSB binasına daa bir sorğuğa alıp kettiler, sorğu advokatsız keçirilgen.
"Qırımdaki Rusiye işğal adalet sisteması aqqında bilmek kerek olğan şeyler tek budır. Qırımda işğalcilerniñ printsiplerine köre azaplar yapıldı: Ukrayina qanunlarını körmemezlikke uramız, halqara qanunlarnı eşitilmeymiz ve eşitmek istemeymiz, Rusiye qanunlarınen kimnen ve ne istegenimizni yapamız!" — dep qoştı Bariyev.
Belâlov evel Rusiyeniñ telükesizlik küçleri tarafından iskencege artıq oğratılğanını da hatırlatt.
Rusiyeniñ telükesizlik quvetleri bu vaziyetke fikir izaatlamaylar
